ადამიანი არის გამტარი ყველა მიღებული ემოციის, ხელოვნება კი საშუალება ამ ემოციის გადმოცემის. ათასწლეულების განმავლობაში ადამიანები თავიანთ სათქმელს ხელოვნების საშუალებით გამოთქვამდნენ და ამ გზით შეგნებულად, თუ შეუგნებლად უტოვებდნენ მომავალ თაობებს თავიანთ განცდებს, აზრებს, იმედებს, რწმენებს, თავიანთ უნიკალურ ცნობიერებაში გატარებულ რეალობას ინდივიდუალურ დამოკიდებულებას ამოუცნობი, უკიდეგანო სამყაროს მიმართ. ყოველთვის, როცა ვიწყებდი ხელოვნების შესწავლას, მებადებოდა უკმარისობის განცდა, რადგან ჩემი აზრით შეუძლებელია მისი, როგორც ცალკეული დარგის სრულყოფილად შესწავლა ისტორიის, რელიგიის და ნაწილობრივ ფილოსოფიის გარეშე, ისევე, როგორც ანატომია არ ისწავლება სხეულის მხოლოდ ერთ კიდურზე დაკვირვებით. ეს ერთი მთლიანი სხეულია და ჩემთვის ის სამყაროს დასაბამიდან დღემდე დაბადებული ყველა ადამიანის ნაგრძნობს, ნააზრევს და გამოთქმულ ჭეშმარიტებას ნიშნავს. ამიტომ ეს ერთგვარი კვლევაა, რომლის განმავლობაშიც ვეცდები ყველა მნიშვნელოვანი საკითხის ერთად და თანმიმდევრულად, ერთ სივრცეში თავმოყრას, ილუსტრაციებით, სქემებით, ყველა საჭირო ვიზუალური მასალით, რომ ეს კვლევა ნებისმიერი ადამიანისთვის ადვილად აღქმადი და საინტერესო იყოს, რადგან ვთვლი, რომ ხელოვნებას აქვს უმნიშვნელოვანესი როლი. ის არის სიტყვა, რომელიც განსაზღვრავს ცხოვრების დინების მიმართულებას, გარდა ამისა მრჩება შთაბეჭდილება, რომ საზოგადოების უდიდესი ნაწილი სათანადოდ ვერ აცნობიერებს თუ რამხელა გავლენას ახდენს, როგორ ცვლის და ზემოქმედებს ხელოვნება ყოველი ადამიანის როგორც სულიერ, ასევე ფიზიკურ, ყოველდღიურ ცხოვრებაზე. დღეს, უკვე შემიძლია ვთქვა, რომ ჩემი საქმიანობა ილუსტრაციის სფეროში, ძალიან საინტერესო და მნიშვნელოვანი გამოცდილების გარდა, ასევე ერთგვარი კვლევა იყო, რომელმაც ბუნებრივი ფერების და ფორმების, ესთეტიკური ჰარმონიის ძიებით და პოლიგრაფიული ნაწარმის საშუალებით გაზიარებით, დამანახა, რომ ადამიანებზე, განურჩევლად ასაკისა, ინტერესებისა, ეროვნებისა თუ რელიგიისა, ხელოვნება ერთნაირად ზემოქმედებს, რომ შესაძლებელია ერთი ადამიანის მიერ ნაგრძნობი, აღფრთოვანების და აღმაფრენის თუნდაც ქაღალდით გადაცემა და იმავე აღმაფრენის დროისა და სივრცის მიღმა განმეორება სხვა ადამიანში. ამ ძალიან საინტერესო პროცესმა ბევრი რამ დამანახა, დამისახა ახალი მიზნები და გამიხსნა კარი ახალი მოგზაურობისთვის, სამყაროში, რომელიც უზომოდ მიყვარს.